పూరీ ‘స్లమ్‌డాగ్’ రిలీజ్‌లో ఆలస్యం.. ఓటీటీ డీలే కారణమా?

డ్యాషింగ్ డైరెక్టర్ పూరీ జగన్నాథ్ దర్శకత్వంలో, వెర్సటైల్ యాక్టర్ విజయ్ సేతుపతి హీరోగా వస్తున్న చిత్రం ‘స్లమ్‌డాగ్: 33 టెంపుల్ రోడ్’. షూటింగ్, పోస్ట్ ప్రొడక్షన్ పనులు పూర్తి చేసుకుని ఫస్ట్ కాపీ సిద్ధంగా ఉన్నప్పటికీ, ఈ సినిమా విడుదల తేదీపై ఇంకా స్పష్టత రాలేదు. దీంతో సినిమా రిలీజ్ ఎందుకు ఆలస్యమవుతోందనే దానిపై ఇండస్ట్రీ వర్గాల్లో ఆసక్తికరమైన చర్చ జరుగుతోంది.

విశ్వసనీయ సమాచారం ప్రకారం.. ఈ జాప్యానికి ప్రధాన కారణం ఓటీటీ డీల్ ఇంకా ఖరారు కాకపోవడమేనని ప్రచారం జరుగుతోంది. థియేట్రికల్ రిలీజ్ డేట్ ప్రకటించే ముందే ఒక ప్రముఖ ఓటీటీ ప్లాట్‌ఫామ్‌తో డిజిటల్ స్ట్రీమింగ్ హక్కుల ఒప్పందాన్ని పూర్తి చేయాలని నిర్మాతలు భావిస్తున్నట్లు తెలుస్తోంది. ప్రస్తుతం చర్చలు జరుగుతున్నాయని, ఈ డీల్ ఖరారైన వెంటనే అధికారికంగా విడుదల తేదీని ప్రకటించే అవకాశం ఉందని సమాచారం.

పూరీ కనెక్ట్స్ బ్యానర్‌పై పాన్ ఇండియా స్థాయిలో రూపొందుతున్న ఈ చిత్రంలో టబు, సంయుక్త, దునియా విజయ్ కీలక పాత్రలు పోషిస్తున్నారు. హర్షవర్ధన్ రామేశ్వర్ సంగీతం అందిస్తున్న ఈ సినిమాను తెలుగుతో పాటు తమిళ, కన్నడ, మలయాళ, హిందీ భాషల్లో విడుదల చేయడానికి సన్నాహాలు చేస్తున్నారు.